Sakuoma, ka nedėdėlė garbie īr svetėmuoms kalbuoms rokoutėis, bet dėdėlė sarmata savuosės gerā nemuokietė. Ta šimeta, kap ėr vėsumet, artiejint Tarptautėnē gimtuosės kalbuos dėinā, katrou pruovėjem vaserė 21-uo, Skouda rajuona savėvaldībės R. Granauskė vėišuoji bėbliuoteka so Skouda žemaitiu draugėjė kvėit rašītė žemaitiu kalbuos dėktanta. Tou jau dėrbsem devinta karta.

Vaserė 6 d. organizoujema dėktanta tėkslā – pruopagoutė žemaitiu kalba ėr muokītėis anuos gramatikas.

Rašītė dėktanta gal vėsė solaukė 14-as metu, nepriklausuomā no anū gīvenamuosės vėitas.

Kap ėr onkstiau, galies rašītė Viežaitiu kultūras cėntrė arba veizont tėisiuogėnė transliacėjė interneta suocialėnė tinkla „Facebook“ Skouda rajuona savėvaldībės R. Granauskė vėišuoji bėbliuotekas paskīruo.

Tus, katrėi nuor rašītė dėktanta kultūras cėntrė, dėdėlē kvėitam lig vaserė 4 d. ožsėregistroutė elektruonėnio pašto , arba 067632674

Dėktanta pradė – 18 val.

Pasėbėngos dėktanta transliacėjē internetė, anou rašiosė̄jē ne bėbliuotekuo par 30 mėnotu tories atsiūstė teksta „Word“ pormato arba noskenouta, nopaveikslouta ronko rašīta varijanta elektruonėnio pašto .

Dėktanta dalīviu gebiejėmā būs vertėnamė, atsėžvelgont i kraštietė kalbėninka dr. Pabriežas Jūzopa veikalė „Žemaitiu kalba ėr rašība“ ėšdiestītas šiuos kalbuos gramatikas taisīklės.

Tarptautėnē gimtuosės kalbuos dėinā skėrtamė rėngėnie, katras tradicėškā būs vaserė 21 d. Skouda rajuona savėvaldībės Romoalda Granauskė vėišuojie bėbliuotekuo (laika noruodīsem vieliau), trīs, katrėi padėrbs parvės mažiau klaidū, būs apduovėnuotė prizās ėr padiekuos raštās.

Kuožna meta dėktanta raša žemaitē ne tik ėš Žemaitėjės, bet ėr ėš kėtū Lietovuos regijuonu, net ožsėinė. Pasėtruopėi ėr vėns kėts sava gebiejėmus žemaitiu kalbuos rašībuo benuoris ėšmiegintė aukštaitis. Ta laukam kuo dėdesnė dėktanta dalīviu būrė.